આમ આદમી પાર્ટી અને રાજ્યસભા સાંસદ રાઘવ ચઢ્ઢા વચ્ચેના સંબંધો વણસ્યા છે. ડેપ્યુટી લીડર પદેથી હટાવ્યા બાદ હવે પંજાબ સરકારે તેમની 'ઝેડ પ્લસ' સુરક્ષા પાછી ખેંચી લીધી છે. વધુમાં, પાર્ટીએ એવો ગંભીર આરોપ પણ લગાવ્યો છે કે સાંસદ અશોક મિત્તલના ઘરે થયેલી ઈડીની રેડ પાછળ રાઘવ ચઢ્ઢાનો હાથ છે. જોકે, પાર્ટી તેમને સસ્પેન્ડ કે બહાર કરવામાં ખચકાઈ રહી છે કારણ કે પક્ષમાંથી કાઢ્યા પછી પણ તેમની રાજ્યસભાની સદસ્યતા યથાવત રહેશે, જેનાથી ગૃહમાં પાર્ટીનું સંખ્યાબળ ઘટી શકે છે.

પાર્ટી અને રાઘવ ચઢ્ઢા વચ્ચેના મનભેદનો પ્રથમ મોટો સંકેત સુરક્ષા વ્યવસ્થામાં થયેલા ફેરફારથી મળ્યો છે. અગાઉ રાઘવ ચઢ્ઢા પાસે પંજાબ પોલીસની 'ઝેડ પ્લસ' સુરક્ષા હતી, જે હવે પરત ખેંચી લેવામાં આવી છે. જોકે, રસપ્રદ વાત એ છે કે કેન્દ્ર સરકાર દ્વારા તેમને 'ઝેડ' કેટેગરીની સુરક્ષા પૂરી પાડવામાં આવી છે. રાજકીય પંડિતો આ ઘટનાક્રમને રાઘવ ચઢ્ઢાની ભાજપ સાથે વધતી નિકટતા તરીકે જોઈ રહ્યા છે. આ મહિનાની શરૂઆતમાં જ તેમને પક્ષ દ્વારા ડેપ્યુટી લીડર પદ પરથી હટાવવામાં આવ્યા હતા, જે દર્શાવે છે કે પાર્ટી નેતૃત્વ હવે તેમના પર ભરોસો કરી રહ્યું નથી.

બીજો અને વધુ આક્રમક સંકેત ત્યારે મળ્યો જ્યારે 'આપ'ના નેતાઓએ સીધો આરોપ લગાવ્યો કે રાઘવ ચઢ્ઢા ભાજપના ટોચના નેતાઓ સાથે સંપર્કમાં છે. પાર્ટીના રાષ્ટ્રીય મીડિયા પ્રભારી અનુરાગ ઢાન્ડાએ દાવો કર્યો હતો કે રાઘવ ચઢ્ઢાની જગ્યાએ ડેપ્યુટી લીડર બનેલા અશોક કુમાર મિત્તલના ઘરે પડેલા ઈડીના દરોડા પાછળ રાઘવ ચઢ્ઢાનું ષડયંત્ર છે. પાર્ટીના મતે, પદ છીનવાઈ જવાથી નારાજ ચઢ્ઢાએ ભાજપના નેતાઓ સાથે મળીને આ રેડ કરાવી છે જેથી અશોક મિત્તલને ડરાવી શકાય. આ ગંભીર આરોપો બાદ હવે સ્પષ્ટ છે કે પાર્ટી રાઘવ ચઢ્ઢાને પક્ષમાં રાખવાના મૂડમાં નથી.

જોકે, આટલા વિવાદ છતાં પાર્ટી રાઘવ ચઢ્ઢા સામે આખરી એક્શન લેતા કેમ અટકી રહી છે? તેની પાછળ એક મોટું વ્યૂહાત્મક કારણ છે. જો આમ આદમી પાર્ટી રાઘવ ચઢ્ઢાને પક્ષમાંથી હાંકી કાઢે છે, તો પણ નિયમો મુજબ તેમની રાજ્યસભાની સદસ્યતા રદ થતી નથી. તેઓ અપક્ષ સાંસદ તરીકે ગૃહમાં રહી શકે છે. જો તેઓ પક્ષમાં રહે તો વિપરીત સંજોગોમાં પણ તેમને પાર્ટી વ્હિપ (Whip) નું પાલન કરવું પડે છે. જો તેમને કાઢી મૂકવામાં આવે તો પાર્ટી રાજ્યસભામાં એક મહત્વનું મતોનું સંખ્યાબળ ગુમાવી શકે છે. સ્વાતિ માલીવાલના કિસ્સામાં પણ પાર્ટી આ જ કારણસર ચૂપ બેઠી છે.

રાજકીય નિષ્ણાતો માને છે કે રાઘવ ચઢ્ઢા અને આમ આદમી પાર્ટી વચ્ચેનો આ હંગામો હવે અટકવાનો નથી. એક સમયે લંડનમાં આંખની સારવાર માટે ગયેલા રાઘવ ચઢ્ઢા લાંબા સમય સુધી ગેરહાજર રહ્યા ત્યારે જ મતભેદોની શરૂઆત થઈ હતી. હવે જ્યારે સુરક્ષા છીનવાઈ છે અને ઈડીના દરોડા સાથે તેમના નામ જોડાઈ રહ્યા છે, ત્યારે ગમે તે સમયે ફાઈનલ ફેંસલો આવી શકે છે. બિહારના રાજકારણની જેમ જ પંજાબ અને દિલ્હીના આ નેતા વચ્ચેનો સંઘર્ષ આગામી દિવસોમાં વધુ ઉગ્ર બને તેવી પૂરેપૂરી શક્યતા છે.