અમેરિકી રાષ્ટ્રપતિ ડોનાલ્ડ ટ્રમ્પની સુરક્ષામાં ફરી એકવાર બહુ મોટી અને ચોંકાવનારી ક્ષતિ સામે આવી છે. વોશિંગ્ટન સ્થિત રાષ્ટ્રપતિના સત્તાવાર નિવાસસ્થાન વ્હાઇટ હાઉસની બહાર સુરક્ષામાં તૈનાત પોલીસ સ્ટાફ પર એક માથાભારે શખ્સે અચાનક રાઇફલ વડે અંધાધુંધ ગોળીબાર શરૂ કરી દીધો હતો. પ્રત્યક્ષદર્શીઓના જણાવ્યા અનુસાર, હુમલાખોર પોતાની બેગમાંથી અત્યાધુનિક હથિયાર કાઢીને આવ્યો હતો અને જોતજોતામાં તેણે ઉપરાઉપરી અંદાજે 25 રાઉન્ડ ફાયરિંગ કરીને સમગ્ર વિસ્તારમાં દહેશત ફેલાવી દીધી હતી. સદનસીબે આ ભયાનક ગોળીબારમાં કોઈ પોલીસકર્મીને ઈજા થઈ નથી, પરંતુ ક્રોસ ફાયરિંગમાં અન્ય એક સામાન્ય નાગરિક ઘાયલ થયો હોવાના અહેવાલ છે. આ હુમલા બાદ તુરંત એક્શનમાં આવેલી સીક્રેટ સર્વિસ (Secret Service) ના કમાન્ડોએ જવાબી કાર્યવાહીમાં હુમલાખોરને સ્થળ પર જ ગોળી મારીને ઢાળી દીધો હતો. મૃતક હુમલાખોરની ઓળખ નસીરે બેસ્ટ (Nasire Best) તરીકે થઈ છે.

હુમલા સમયે વ્હાઇટ હાઉસની અંદર જ હતા ડોનાલ્ડ ટ્રમ્પ

જ્યારે વ્હાઇટ હાઉસના ગેટ પાસે આ અંધાધુંધ ફાયરિંગ થયું, તે સમયે રાષ્ટ્રપતિ ડોનાલ્ડ ટ્રમ્પ બહાર જવાને બદલે બિલ્ડિંગની અંદર જ હાજર હતા. ગોળીઓનો અવાજ સાંભળતા જ તેમની આસપાસ રહેતી સ્પેશિયલ સીક્રેટ સર્વિસ તત્કાલ પ્રભાવથી સક્રિય થઈ ગઈ હતી અને આખા વ્હાઇટ હાઉસ પરિસરને ચારેય તરફથી લોકડાઉન કરીને લશ્કરી કિલ્લામાં ફેરવી દીધું હતું. ફાયરિંગના મેસેજ મળતા જ અમેરિકાની ટોચની તપાસ એજન્સી ફેડરલ બ્યુરો ઓફ ઇન્વેસ્ટિગેશન (FBI) ના ઉચ્ચ અધિકારીઓનો કાફલો ઘટનાસ્થળે પહોંચી ગયો હતો. FBI ના નવનિયુક્ત ડિરેક્ટર કાશ પટેલે (Kash Patel) પોતે વ્હાઇટ હાઉસ પહોંચીને સુરક્ષા વ્યવસ્થાની સમીક્ષા કરી હતી અને ગ્રાઉન્ડ ઝીરોની સ્થિતિનો તાગ મેળવ્યો હતો. તેમણે સોશિયલ મીડિયા પ્લેટફોર્મ 'X' પર સત્તાવાર પોસ્ટ કરીને આ ફાયરિંગની ઘટનાની પુષ્ટિ કરી છે.