ભારત અને ન્યૂઝીલેન્ડ વચ્ચે શરૂ થનારી ટી20 સિરીઝ પહેલા ટીમ ઇન્ડિયાને મોટો ઝટકો લાગ્યો છે. મિડલ ઓર્ડરના મહત્વના બેટ્સમેન તિલક વર્મા ઈજાના કારણે સિરીઝના શરૂઆતના ત્રણ મેચમાંથી બહાર થઈ ગયા છે. આ સમાચાર એવા સમયે સામે આવ્યા છે જ્યારે વર્લ્ડ કપ શરૂ થવામાં હવે એક મહિના કરતાં પણ ઓછો સમય બચ્યો છે, જેના કારણે ટીમ મેનેજમેન્ટની ચિંતા વધતી જોવા મળી રહી છે.

બોર્ડ તરફથી મળેલી માહિતી મુજબ, તિલક વર્માને ગુરુવારે સવારે હોસ્પિટલમાંથી ડિસ્ચાર્જ આપવામાં આવ્યો છે અને તેમની હાલત સ્થિર છે. તેઓ ટૂંક સમયમાં હૈદરાબાદ પરત ફરશે. ડોક્ટરોની સલાહ મુજબ ઘાવ સંપૂર્ણ રીતે સાજો થયા બાદ તેઓ ધીમે ધીમે ફિઝિકલ ટ્રેનિંગ અને બેટિંગ પ્રેક્ટિસ શરૂ કરશે. જોકે, ન્યૂઝીલેન્ડ સામેના પ્રથમ ત્રણ ટી20 મુકાબલામાં તેઓ રમવા માટે ઉપલબ્ધ નહીં રહે.

ટીમ મેનેજમેન્ટનું કહેવું છે કે સિરીઝના છેલ્લાં બે ટી20 મેચમાં તિલક વર્માની ઉપલબ્ધતા તેમની રિકવરી પર નિર્ભર રહેશે. જો તેઓ પ્રેક્ટિસ સેશન અને ફિટનેસ ટેસ્ટમાં સકારાત્મક પ્રગતિ બતાવશે તો તેમને ટીમમાં સામેલ કરવાની સંભાવના રહેશે. હાલ માટે ટીમ ઇન્ડિયાએ કોઈ જોખમ લેવાનું ટાળ્યું છે.

તિલક વર્માની ઈજા ભારતના વર્લ્ડ કપ મિશન માટે પણ મોટો ફટકો માનવામાં આવી રહી છે. એશિયા કપ 2025ના ફાઇનલમાં પાકિસ્તાન સામે નाबाद 69 રનની યાદગાર ઇનિંગ રમીને ભારતને ખિતાબ અપાવનારા તિલક છેલ્લા એક વર્ષથી ટી20 ટીમના મહત્વના પાયા બની ગયા છે. તેમની ગેરહાજરી મિડલ ઓર્ડરની મજબૂતી પર અસર કરી શકે છે.