દેશના અનેક રાજ્યોમાં ચોમાસાની ગતિવિધિઓએ ફરી એકવાર વેગ પકડ્યો છે. ઉત્તર પ્રદેશ, બિહાર, પશ્ચિમ બંગાળ અને ઓડિશામાં છેલ્લા 24 કલાકમાં નોંધપાત્ર વરસાદ નોંધાયા બાદ હવે ભારતીય હવામાન વિભાગ (IMD) દ્વારા ગુજરાત સહિત મધ્ય અને પશ્ચિમ ભારતના રાજ્યો માટે મહત્વની આગાહી કરવામાં આવી છે. બંગાળની ખાડીમાં આકાર લઈ રહેલી નવી લો-પ્રેશર સિસ્ટમના લીધે ગુજરાતમાં 12 સપ્ટેમ્બરથી વરસાદનો નવો તબક્કો શરૂ થવાના સ્પષ્ટ એંધાણ મળી રહ્યા છે.

11 સપ્ટેમ્બરે આકાર લેશે નવી લો-પ્રેશર સિસ્ટમ

હવામાન ખાતાના બુલેટિન મુજબ, 11 સપ્ટેમ્બરની આસપાસ ઉત્તર આંધ્રપ્રદેશ અને દક્ષિણ ઓડિશાના દરિયાકાંઠા સમીપ બંગાળની ખાડીમાં હવાનું હળવું દબાણ સર્જાશે. આ સિસ્ટમ પશ્ચિમ તરફ આગળ વધતાં વાતાવરણમાં ભેજનું પ્રમાણ વધશે, જેના પરિણામે ગુજરાત, મધ્યપ્રદેશ અને છત્તીસગઢ જેવા રાજ્યોમાં વરસાદી જોર વધશે. આ સિવાય, ઉત્તર પ્રદેશ પર અગાઉ સક્રિય થયેલી સિસ્ટમ હવે બિહાર તરફ ફંટાઈ રહી છે, જેથી ત્યાં પણ ગાજવીજ સાથે વરસાદની શક્યતા છે.

ગુજરાત સહિત દેશના અન્ય રાજ્યોમાં વરસાદનું અનુમાન

ગુજરાતમાં 12 સપ્ટેમ્બરથી દક્ષિણ ગુજરાતના મોટાભાગના જિલ્લાઓ તથા સૌરાષ્ટ્રના દરિયાકાંઠાના પંથકોમાં ગાજવીજ સાથે મધ્યમથી ભારે વરસાદ વરસી શકે છે, જેને પગલે સાવચેતીના ભાગરૂપે યલો એલર્ટ જાહેર કરાયું છે. આ સિવાય દેશના અન્ય ભાગોમાં પણ હવામાન પલટાશે:

મધ્ય પ્રદેશ અને છત્તીસગઢ: 10થી 14 સપ્ટેમ્બર દરમિયાન મધ્યમથી ભારે વરસાદની આગાહી.

ઉત્તરાખંડ: 10 સપ્ટેમ્બરથી આગામી ચાર દિવસ સુધી મુશળધાર વરસાદ પડવાની ભીતિ.

ઓડિશા અને તેલંગાણા: તટીય આંધ્રપ્રદેશ, તેલંગાણા અને વિદર્ભમાં 11થી 14 સપ્ટેમ્બર દરમિયાન ભારે પવન અને વીજળીના કડાકા સાથે વરસાદ થઈ શકે છે.

દિલ્હી-એનસીઆર: પંજાબ, હરિયાણા, ચંદીગઢ અને દિલ્હીમાં 13 સપ્ટેમ્બર સુધી છૂટોછવાયો વરસાદી માહોલ રહેશે.

હવામાન વિભાગની આ ચેતવણીને પગલે ખાસ કરીને નીચાણવાળા વિસ્તારો અને ખેડૂતોને જરૂરી સાવચેતી રાખવા સલાહ આપવામાં આવી છે.