ગુજરાતમાં રાજકીય દાનના નામે ટેક્સચોરી કરનારા પર થોડા મહિના પૂર્વે દરોડા પાડવામાં આવ્યા હતા. તેની તપાસ બાદ હવે દાન લેનારા પક્ષોને નિશાન બનાવાયા છે. અમદાવાદ ઉપરાંત ગાંધીનગરના ત્રણ સ્થળો સહિત ગુજરાતમાં 24થી વધુ સ્થળોએ રાજકીય દાનના નામે કાળા-ધોળા કરનારા પર તવાઈ બોલાવાઈ છે. અગાઉ દાન દેનારાઓને ત્યાં આવકવેરા વિભાગ ત્રાટક્યું હતું. હવે દાન લેનારા `નાના રાજકીય પક્ષો'ને ત્યાં આયકર વિભાગ ત્રાટકયું છે.

ગાંધીનગરમાં આજે(12 નવેમ્બર) વહેલી સવારથી ભારતીય નેશનલ જનતા દળના વડા સંજય વિઠ્ઠલભાઈ ગજેરાના ઘર-ઓફિસે પોલીસ બંદોબસ્ત સાથે IT ટીમ ત્રાટકી હતી. ITની એક ટીમ સેકટર 26 કિસાનનગર સ્થિત તેમના ઘરે હથિયારધારી પોલીસ જવાન સાથે ઘરમાં સર્ચ કરી રહી છે. જ્યારે અન્ય ટીમો સેક્ટર 11માં મેઘ મલ્હાર ઓફિસ અને ડ્રાઇવરના ગ્રીનિસિટી ઘરે ત્રાટકી છે. હાલમાં સંજય ગજેરાના ઘરે ITની ટીમ દસ્તાવેજો, સ્થાવર અને જંગમ મિલકત સહિતના પુરાવા ચકાસી રહી છે.

અમદાવાદમાં ડઝનથી વધુ સ્થળોએ ઈન્કમટેકસ દ્વારા ઓપરેશન કરાયું છે તેમાં આવા પક્ષો સાથે સંકળાયેલા આગેવાનો નિશાન બન્યા છે. આવકવેરા વિભાગનાં સુત્રોએ કહ્યું કે, અમદાવાદ ઉપરાંત, સુરત, વડોદરા, રાજકોટ, સહિતનાં શહેરોમાંથી અધિકારીઓની ટીમોને દરોડામાં સામેલ કરવામાં આવી છે.

આ રેડમાં કરોડોના નાણાકીય વ્યવહારો તથા ટેકસ ચોરીનો ખુલાસો થઈ શકે છે. ચેકથી દાનનાં નામે મોટી રકમ મેળવ્યા બાદ કમિશન કાપીને રોકડ પરત કરીને ટેકસ ચોરીની આ મોડસ ઓપરેન્ડી છે.

અમદાવાદ, ગાંધીનગર, જૂનાગઢમાં રેડ ગુજરાતનાં અમદાવાદ, ગાંધીનગર, ઉપરાંત સૌરાષ્ટ્રનાં પણ જૂનાગઢ જેવા શહેરોમાં દરોડા પાડવામાં આવ્યા છે. જોકે વિભાગ તરફથી કોઈ સત્તાવાર સમર્થન આપવામાં આવ્યું નથી. આ કાર્યવાહીના પગલે રાજકીય ક્ષેત્રમાં ખળભળાટ સર્જાયો છે.

રાજકીય દાનના નામે કરચોરીનાં મોટા ખેલ થતા હોવાનું ધ્યાને આવ્યુ હતું ચૂંટણી પંચે તાજેતરમાં આવા પક્ષોની ઝાટકણી કાઢી હતી અને અમાન્ય જાહેર કર્યા હતા. નાની દુકાન કે ઓફિસમાં ચલાવતા આવા પક્ષો દ્વારા રાજકીય દાનના નામે કરચોરીનાં મોટા ખેલ થતા હોવાનું ધ્યાને આવ્યુ હતું.

ગાંધીનગરમાં સંજય ગજેરાના ડ્રાઈવરના મોબાઇલમાંથી મહત્વના પુરાવા મળ્યા ગાંધીનગરમાં ભારતીય નેશનલ જનતા દળના વડા સંજય વિઠ્ઠલભાઈ ગજેરાના ઘર-ઓફિસે પડેલી IT રેડ અંગે સૂત્રોએ જણાવ્યું કે, પાર્ટીના મૂળ સ્થાપક વિઠ્ઠલ ગજેરા છે. જેઓનું કોરોના દરમિયાન અવસાન થતાં પાર્ટીનું સમગ્ર સંચાલન સંજય ગજેરાના હાથમાં આવ્યું હતું. જે બાદ સંજય ગજેરાએ આખું નેટવર્ક ઊભું કર્યું હતું. એક સમયે સંજય ગજેરાને ફ્રન્ટી ગાડી લેવાના પણ ફાંફા હતા. ત્યારે આ વર્ષે જ તેની પાસે MG gloster ગાડી અને હાર્લી ડેવિસન બાઇક પણ છે. સંજય ગજેરાના ડ્રાઈવર રોનકસિંહના મોબાઇલમાંથી પણ કેટલાક મહત્વના પુરાવા ITને હાથ લાગ્યા છે.

ઉલ્લેખનીય છે કે સંજય ગજેરાની પાર્ટી ભારતીય નેશનલ જનતા દળ 2022 ગુજરાત વિધાનસભા અને લોકસભા 2024ની ચૂંટણી લડી હતી. જેમાં પાર્ટીના કુલ 8 ઉમેદવારને 11,496 મત મળ્યા હતા અને 957 કરોડનું દાન મળ્યું હતું.

વિઠ્ઠલ ગજેરાએ સૌરાષ્ટ્રથી ગાંધીનગર આવીને ખાદ્ય તેલનો ધંધો શરૂ કર્યો હતો સૂત્રો પાસેથી મળતી માહિતી મુજબ, વિઠ્ઠલ ગજેરા મૂળ સૌરાષ્ટ્રના રહેવાસી છે. ગાંધીનગર આવીને શરૂમાં તેમણે ખાદ્ય તેલનો ધંધો શરૂ કર્યો હતો. વર્ષોથી તેમની ઓફિસ કે દુકાન ગણો એ સેકટર 24 મેઈન શોપિંગમાં હતી. બાદમાં તેમણે સેકટર 24માં જ ગેરકાયદેસર રીતે સોલવંટનો ધંધો શરૂ કર્યો હતો. જે મામલે પોલીસ કેસ પણ થયેલા છે. તો એક ગુનામાં પાસા પણ થઈ હતી.

પાર્ટીનાં નામે કરોડોની આવક હવાલા મારફતે મોકલી દેવાતી, ટકાવારી સંજય ગજેરાને મળતી બાદમાં વિઠ્ઠલ ગજેરાને રાજ્કીય મહેચ્છા જાગૃત થઈ હતી અને તેમનો સંપર્ક ભારતીય નેશનલ જનતા દળ પાર્ટી સાથે થયો હતો. અને કોઈ રીતે વિઠ્ઠલ ગજેરા રાષ્ટ્રીય અધ્યક્ષ બની ગયા હતા. જેમણે ગાંધીનગર સહિત ગુજરાતમાં પાર્ટીનો પાયો નાંખ્યો હતો. જોકે કોરોનાકાળમાં વિઠ્ઠલ ગજેરાનું મોત થતાં પાર્ટીની કમાન તેમના દીકરા સંજય ગજેરાના હાથમાં આવી ગઈ હતી. જે બહુ ભણેલો નથી. માનવામાં આવી રહ્યું છે કે પાર્ટીનાં નામે આવેલી કરોડોની આવક હવાલા મારફતે મોકલી દેવામાં આવતી હતી. જેની અમુક ટકાવારી સંજય ગજેરાને મળતી હતી.

ભારતીય નેશનલ જનતા દળ 957 કરોડની આવકની દૃષ્ટિએ ગુજરાતમાં ટોપ પર ચૂંટણીમાં ખૂબ ઓછા વોટ મેળવનારા પક્ષોને રજીસ્ટર્ડ અનરેગ્નાઈઝ્ડ(અમાન્ય) કહેવામાં આવે છે. આ પક્ષ ચૂંટણી પંચમાં રજીસ્ટર્ડ તો હોય છે પરંતુ ઓછા મતોને કારણે માન્યતા પ્રાપ્ત ગણાતા નથી. ગુજરાતમાં રજીસ્ટર્ડ થયેલા આવા પાંચ પક્ષોને છેલ્લા પાંચ વર્ષમાં યોજાયેલી બે લોકસભા અને એક વિધાનસભા ચૂંટણીમાં કુલ 22 હજાર મત મળ્યા હતા. તેમને રાજ્યમાં કુલ 17 ઉમેદવાર ઊભા રાખ્યા હતા. ADRના રિપોર્ટ મુજબ, 2019-20થી 2023-24 દરમિયાન આ 5 પક્ષોની કુલ આવક 2316 કરોડ છે. જ્યારે એક વર્ષની આવક 1158 કરોડ છે. દેશના આવા ટોપ-10 કમાણી કરતાં પક્ષોમાં ગુજરાતના 5 પક્ષ છે. જે પૈકી ભારતીય નેશનલ જનતા દળ 957 કરોડની આવકની દૃષ્ટિએ ટોપ ઉપર છે.