અમદાવાદના એલ.ડી. એન્જિનિયરિંગ કોલેજ કેમ્પસમાં બનેલી મારામારીની ઘટના હાલ statewide ચર્ચાનો વિષય બની છે. મળતી માહિતી મુજબ, વિદ્યાર્થીઓના એક ટોળાએ જમ્મૂના વિદ્યાર્થીઓ પર હુમલો કર્યો હતો. આ આખી ઘટના એક વોટ્સએપ ગ્રુપમાં થયેલી બોલાચાલીને કારણે શરૂ થઈ હતી. ગ્રુપમાં જમ્મુના વિદ્યાર્થી સંદીપ રાણા અને ABVPના વિદ્યાર્થી દેવ કોઈસા વચ્ચે મેસેજને લઈને તીવ્ર બોલાચાલી થઈ હતી, જેના પગલે તણાવ વધ્યો હતો.

આક્ષેપો અનુસાર, રાત્રિના સમયે ABVP સાથે સંકળાયેલા વિદ્યાર્થીઓનું ટોળું હોસ્ટેલમાં ઘૂસ્યું હતું. તે સમયે સંદીપ રૂમમાં ન હોવાથી, ટોળાએ સૂતા અન્ય વિદ્યાર્થીને સંદીપ સમજીને માર માર્યો હતો. હુમલાના શિકાર વિદ્યાર્થીએ કહ્યું છે કે હુમલો એટલો અચાનક હતો કે તેને કંઈ સમજાય નહીં, અને હુમલાખોરો દેવ કોઈસાનું નામ લઇ ધમકીઓ આપી રહ્યા હતા. વધુમાં, દેવ કોઈસાએ પોતે ડીજીપી અને મેજિસ્ટ્રેટનો દીકરો હોવાનો દાવો કર્યાની પણ માહિતી સામે આવી છે.

હોસ્ટેલમાં ટોળું ઘૂસતું અને વિદ્યાર્થીઓને મારતાં હોવાનો વીડિયો સોશિયલ મીડિયામાં વાયરલ થઈ રહ્યો છે, જે બાદ સમગ્ર મામલે ઉગ્ર પ્રતિક્રિયા જોવા મળી રહી છે. વીડિયો વાયરલ થતા મામલો સીધો ગુજરાત યુનિવર્સિટી પોલીસ સ્ટેશન સુધી પહોંચ્યો છે, જ્યાં FIR અને અન્ય કાર્યવાહી અંગે ચર્ચા ચાલી રહી છે.

પોલીસે સમગ્ર ઘટનાની તપાસ શરૂ કરી છે અને હોસ્ટેલના CCTV ફૂટેજ સહિતના પુરાવા એકત્રિત કરી રહી છે. કોલેજ મેનેજમેન્ટને પણ વિદ્યાર્થીઓની સલામતી અંગે અલર્ટ રહેવા સૂચના આપવામાં આવી છે. બીજી તરફ, જમ્મૂના વિદ્યાર્થીઓએ માંગ કરી છે કે હુમલાખોરોની ઓળખ કરીને તેમને તાત્કાલિક સજા કરવામાં આવે. આ ઘટનાથી કેમ્પસમાં ભય અને તણાવનું વાતાવરણ સર્જાયું છે. વિદ્યાર્થીઓ, વાલીઓ અને કોલેજ પ્રશાસન તમામ તપાસના અંતિમ પરિણામની રાહ જોઈ રહ્યા છે.