બનાસકાંઠા જિલ્લામાં આજે વાતાવરણમાં અચાનક મોટો પલટો જોવા મળ્યો છે. વહેલી સવારથી જ આકાશમાં ઘેરા વાદળો છવાતા મધ્ય શિયાળામાં માવઠું વરસ્યું હતું, જેના કારણે ખેડૂતોની મુશ્કેલીઓ વધી ગઈ છે. ખાસ કરીને પાલનપુર અને આસપાસના પંથકોમાં કમોસમી વરસાદના ઝાપટાં પડી રહ્યા છે. આ અચાનક વરસાદે ખેડૂતોમાં ચિંતા ફેલાવી છે કારણ કે હાલના સમયે ખેતરોમાં ઘઉં, ચણા અને ધાણા જેવા મુખ્ય શિયાળુ પાકો ઉભા છે, અને આવા સમયે પડતો માવઠો પાકને નુકસાન પહોંચાડી શકે છે.

પાલનપુર ઉપરાંત અમીરગઢ, દાંતીવાડા અને વડગામ વિસ્તારમાં પણ વરસાદ નોંધાયો છે. વરસાદના કારણે માર્ગો પર પાણી ભરાઈ જતા વાહન ચાલકોને પણ મુશ્કેલીઓનો સામનો કરવો પડી રહ્યો છે. શહેર તેમજ ગ્રામ્ય વિસ્તારોના મુખ્ય રસ્તાઓ પર પાણી ભરાવાના બનાવો સર્જાયા છે, જેના કારણે ટ્રાફિક ધીમો પડ્યો છે. કેટલાક વિસ્તારોમાં કાદવ અને પાણીના કારણે વાહનચાલન વધુ જોખમી બન્યું છે.

હવામાન વિભાગે જણાવ્યું છે કે હાલ પવનની દિશા દક્ષિણ-પૂર્વથી પૂર્વ તરફ રહેતા હવામાં ભેજનું પ્રમાણ વધી ગયું છે. આ વધેલી ભેજ અને બદલાતા પવનના કારણે તાપમાન સામાન્ય કરતાં વધારે નોંધાઈ રહ્યું છે. શિયાળાની સીઝન ચાલી રહી હોવા છતાં દિવસ દરમિયાન તાપમાનમાં વધઘટ જોવા મળી રહી છે. હવામાન વિભાગ મુજબ આગામી બે દિવસ સુધી તાપમાન વધતું રહેશે, બાદમાં ધીમે ધીમે ઘટાડો નોંધાઈ શકે છે.

ખેડૂતોનું કહેવું છે કે જો આવું માવઠું ચાલુ રહેશે તો પાકના ગુણવત્તા અને ઉત્પાદન પર સીધી અસર પડશે. ખાસ કરીને ઘઉં અને ધાણા જેવા પાક માટે વરસાદ નુકસાનકારક સાબિત થઈ શકે છે. બનાસકાંઠા જિલ્લાના અનેક ખેડૂતો હાલ હવામાનની અનિશ્ચિતતા વચ્ચે ઉપાયોની ચર્ચા કરી રહ્યા છે અને પાકને બચાવવા જરૂરી પગલાં લેવા આયોજન કરી રહ્યા છે.