16 એપ્રિલ 2026 ના રોજ દિલ્હી એરપોર્ટ પર સ્પાઈસ જેટ અને અકાસા એરના બે વિમાનો વચ્ચે ટક્કર થઈ હતી. ટેક્સિંગ દરમિયાન સ્પાઈસ જેટના વિમાનનો જમણો વિંગલેટ અકાસા એરના વિમાનના સ્ટેબિલાઈઝર સાથે અથડાયો હતો. આ અકસ્માતમાં કોઈને ઈજા થઈ નથી, પરંતુ સુરક્ષાના કારણોસર વિમાનોને સેવામાંથી હટાવી દેવાયા છે. અકાસા એરના હૈદરાબાદ જઈ રહેલા મુસાફરો માટે વૈકલ્પિક વ્યવસ્થા કરવામાં આવી હતી.

આ ઘટના ત્યારે બની જ્યારે સ્પાઈસ જેટનું B737-700 વિમાન રનવે પરથી બે (Bay) તરફ જઈ રહ્યું હતું. સ્પાઈસ જેટના પ્રવક્તાએ સત્તાવાર નિવેદનમાં જણાવ્યું કે, ટેક્સિંગ દરમિયાન થયેલી આ ટક્કરમાં તેમના વિમાનના જમણા વિંગલેટને નુકસાન થયું છે. આ સાથે જ બીજી એરલાઇન એટલે કે અકાસા એરના વિમાનના ડાબા હાથના હોરિઝોન્ટલ સ્ટેબિલાઈઝરને પણ નુકસાન પહોંચ્યું હતું. પ્રોટોકોલ મુજબ, સ્પાઈસ જેટે તાત્કાલિક અસરથી તેમના વિમાનને દિલ્હી એરપોર્ટ પર જ રોકી દીધું છે જેથી ટેકનિકલ તપાસ પૂર્ણ કરી શકાય.

બીજી તરફ, અકાસા એરની ફ્લાઈટ QP-1406 દિલ્હીથી હૈદરાબાદ જવા માટે તૈયાર હતી અને બે એરિયામાં પાર્ક કરેલી હતી. અકાસા એરના પ્રવક્તાના જણાવ્યા અનુસાર, જ્યારે તેમનું વિમાન સ્થિર ઊભું હતું ત્યારે અન્ય એરલાઇનનું વિમાન તેની સાથે અથડાયું હતું. અકસ્માત બાદ તરત જ એન્જિનિયરો અને ગ્રાઉન્ડ સ્ટાફ ઘટનાસ્થળે પહોંચી ગયા હતા. વિમાનમાં સવાર તમામ મુસાફરોને સુરક્ષિત રીતે નીચે ઉતારવામાં આવ્યા હતા અને તેમને હૈદરાબાદ પહોંચાડવા માટે એરલાઇન દ્વારા અન્ય વિમાનની વ્યવસ્થા કરવામાં આવી હતી.

એરપોર્ટ પર વિમાનોની સુરક્ષાને લઈને આ પ્રકારની ઘટનાઓ ચિંતાનો વિષય બની છે. બંને એરલાઇન કંપનીઓએ નાગરિક ઉડ્ડયન નિયામક (DGCA) અને સંબંધિત અધિકારીઓને આ અંગે જાણ કરી દીધી છે. હાલમાં એ વાતની તપાસ કરવામાં આવી રહી છે કે શું આ પાઇલટની ભૂલ હતી કે ગ્રાઉન્ડ કંટ્રોલ તરફથી મળેલી સૂચનાઓમાં કોઈ ક્ષતિ હતી. વિમાનોના વિંગ્સ ટકરાવા જેવી ઘટનાઓ ટેકનિકલ દ્રષ્ટિએ વિમાનની ઉડાન ક્ષમતા પર મોટી અસર કરી શકે છે, તેથી બંને એરલાઇન્સે વિમાનોના સંપૂર્ણ રિપેરિંગ અને ક્લિયરન્સ વગર તેમને ફરીથી ઉડાન ભરવા પર રોક લગાવી છે.

નોંધનીય છે કે એરપોર્ટ પર ગ્રાઉન્ડ ઈન્સિડેન્ટની આ કોઈ પ્રથમ ઘટના નથી. ગત અઠવાડિયે જ કોલકાતાના નેતાજી સુભાષ ચંદ્ર બોઝ ઈન્ટરનેશનલ એરપોર્ટ પર પણ આવી જ એક વિચિત્ર ઘટના બની હતી, જ્યાં ડ્રાઈવર વગરનું એક થર્ડ પાર્ટી વાહન પાર્ક કરેલા ઈન્ડિગો વિમાન સાથે અથડાયું હતું. આ સતત બની રહેલી ઘટનાઓ એરપોર્ટ ગ્રાઉન્ડ સેફટી પ્રોટોકોલ પર સવાલો ઉભા કરી રહી છે. દિલ્હીની આ ઘટના બાદ એરપોર્ટ પર ટેક્સિંગ અને પાર્કિંગની પ્રક્રિયાને વધુ ચુસ્ત બનાવવાની દિશામાં વિચારણા કરવામાં આવી રહી છે.