પાવીજેતપુર : છોટાઉદેપુર જિલ્લાના પાવીજેતપુર પોલીસ સ્ટેશન વિસ્તારમાં પોલીસની સઘન કામગીરીના ભાગરૂપે બાતમીના આધારે એમ્બ્યુલન્સની આડમાં ગુજરાતમાં ઘૂસાડવામાં આવતો વિદેશી દારૂનો મોટો જથ્થો ઝડપી પાડવામાં આવ્યો છે. જોકે, દારૂની હેરાફેરી કરનાર આરોપી પોલીસને ચકમો આપી સ્થળ પરથી ફરાર થવામાં સફળ રહ્યો હતો. પ્રાપ્ત માહિતી અનુસાર, પાવીજેતપુર પોલીસને ગુપ્ત બાતમી મળી હતી કે એક એમ્બ્યુલન્સમાં વિદેશી દારૂનો મોટો જથ્થો ગુજરાતમાં લાવવામાં આવી રહ્યો છે. આ બાતમીના આધારે પોલીસે પાવીજેતપુર તાલુકાના મોટી રાસલી ગામેથી અને પાવીજેતપુર પાસે જનતા ડાયાવર્ઝન પર સઘન ચેકિંગ હાથ ધર્યું હતું.  

ચેકિંગ દરમિયાન, શંકાસ્પદ જણાતી એક એમ્બ્યુલન્સને રોકવાનો પ્રયાસ કરવામાં આવ્યો હતો. પોલીસે જ્યારે એમ્બ્યુલન્સની તલાશી લીધી, ત્યારે અંદરથી દવાઓ કે દર્દીઓને બદલે મોટી માત્રામાં વિદેશી દારૂનો જથ્થો મળી આવ્યો હતો. પોલીસે એમ્બ્યુલન્સમાંથી વિદેશી દારૂની કુલ ૯૨૮ બોટલો જપ્ત કરી હતી. જપ્ત કરાયેલા આ વિદેશી દારૂની કુલ કિંમત આશરે ₹2,55,200 જેટલી થાય છે. જોકે, પોલીસની આ કાર્યવાહી દરમિયાન, દારૂની હેરાફેરી કરનાર આરોપી પોલીસને જોઈને તુરંત જ સ્થળ પરથી ભાગી છૂટ્યો હતો. 

પોલીસે દારૂ અને એમ્બ્યુલન્સ કબજે કરીને ફરાર આરોપી વિરુદ્ધ પ્રોહિબિશન એક્ટ હેઠળ ગુનો નોંધી, તેને ઝડપી પાડવા માટે વધુ તપાસના ચક્રો ગતિમાન કર્યા છે. પાવીજેતપુર તાલુકાના મોટી રાસલી ગામેથી એમ્બ્યુલન્સની આડમાં લઈ જવાતો ₹ 2.55 લાખનો વિદેશી દારૂ ઝડપવામાં પોલીસને સફળતા મળી હતી.