ભારત અને અમેરિકા વચ્ચે ટ્રેડ ડીલની વાટાઘાટો ફરી તેજ બની છે. ભારતીય વાટાઘાટકારોની એક ટીમ ૨૦ થી ૨૨ એપ્રિલ દરમિયાન અમેરિકાની મુલાકાત લેશે. આ મુલાકાત વડાપ્રધાન નરેન્દ્ર મોદી અને અમેરિકી રાષ્ટ્રપતિ ડોનાલ્ડ ટ્રમ્પ વચ્ચે તાજેતરમાં થયેલી ૪૦ મિનિટની ટેલિફોનિક વાતચીત બાદ યોજાઈ રહી છે. બેઠકનો મુખ્ય એજન્ડા નવા ૧૦% ટેરિફ સ્ટ્રક્ચર પર સ્પષ્ટતા મેળવવાનો અને લાંબા સમયથી લંબિત ટ્રેડ ડીલને અંતિમ ઓપ આપવાનો છે.

આ મહત્વપૂર્ણ બેઠકની પૃષ્ઠભૂમિ વડાપ્રધાન નરેન્દ્ર મોદી અને રાષ્ટ્રપતિ ડોનાલ્ડ ટ્રમ્પ વચ્ચે ૧૪ એપ્રિલના રોજ થયેલી ૪૦ મિનિટની ટેલિફોનિક વાતચીત દ્વારા તૈયાર કરવામાં આવી છે. પશ્ચિમ એશિયાના તણાવ અને ઈરાન-અમેરિકા વચ્ચેના અસ્થાયી સંઘર્ષવિરામ બાદ બંને નેતાઓ વચ્ચેની આ પ્રથમ વાતચીત હતી. ભારતમાં અમેરિકાના રાજદૂત સર્જિયો ગોરે આ વાતચીતને અત્યંત સકારાત્મક ગણાવી છે. તેમણે સંકેત આપ્યા છે કે આગામી દિવસોમાં ઉર્જા અને વ્યાપાર ક્ષેત્રે બંને દેશો વચ્ચે મોટા કરારો જોવા મળી શકે છે. વડાપ્રધાને પણ સોશિયલ મીડિયા પર આ વાતચીતની પુષ્ટિ કરતા જણાવ્યું હતું કે ભારત અને અમેરિકા વ્યૂહાત્મક ભાગીદારીને વધુ મજબૂત કરવા માટે પ્રતિબદ્ધ છે.

ભારતીય પ્રતિનિધિમંડળ ૨૦ થી ૨૨ એપ્રિલ દરમિયાન વોશિંગ્ટનમાં અમેરિકી અધિકારીઓ સાથે મુલાકાત કરશે. આ બેઠકમાં અમેરિકાના નવા ટેરિફ ફ્રેમવર્ક પર ભાર મૂકવામાં આવશે. ઉલ્લેખનીય છે કે રાષ્ટ્રપતિ ટ્રમ્પના 'રેસીપ્રોકલ ટેરિફ'ને સુપ્રીમ કોર્ટે ગેરકાયદેસર જાહેર કર્યા બાદ, ટ્રમ્પ વહીવટીતંત્રે ૨૪ ફેબ્રુઆરીથી ૧૫૦ દિવસ માટે તમામ દેશો પર ૧૦% ટેરિફ લાદવાની જાહેરાત કરી છે. ભારત આ મામલે સ્પષ્ટતા ઈચ્છે છે કે જે દેશો સાથે ટ્રેડ ડીલ પર સહમતિ બની ચુકી છે, તેમને આ નવા ટેરિફમાંથી કેવી રીતે મુક્તિ મળશે. અગાઉ ફેબ્રુઆરીમાં પ્રસ્તાવિત બેઠક આ ટેરિફના ફેરફારોને કારણે જ સ્થગિત રાખવામાં આવી હતી.

જોકે, આ વાટાઘાટો જેટલી સરળ દેખાય છે એટલી છે નહીં. યુનાઇટેડ સ્ટેટ્સ ટ્રેડ રિપ્રેઝન્ટેટિવ (USTR) દ્વારા ભારત સહિત ૬૦ દેશો સાથેના દ્વિપક્ષીય વેપારની 'સેક્શન ૩૦૧' હેઠળ તપાસ શરૂ કરવામાં આવી છે. વધુમાં, ભારત અને ચીન જેવી ૧૬ અર્થવ્યવસ્થાઓની ઔદ્યોગિક નીતિઓની અલગથી તપાસ કરવામાં આવી રહી છે. આ તપાસને કારણે વ્યાપારી વાટાઘાટો થોડી જટિલ બની છે. ભારતીય પ્રતિનિધિમંડળ આ બેઠકમાં ભારતના પક્ષને મજબૂતીથી રજૂ કરશે અને અમેરિકી બજારમાં ભારતીય વસ્તુઓ માટે વધુ સારી પહોંચની માંગણી કરશે.