બિહારના મુખ્યમંત્રી પદેથી રાજીનામું આપ્યા બાદ નીતિશ કુમારે 2005થી અત્યાર સુધીના વિકાસ કાર્યોનો હિસાબ રજૂ કર્યો છે. તેમણે જણાવ્યું કે રાજ્યમાં 'કાયદાનું શાસન' સ્થાપિત કરવું તેમની પ્રાથમિકતા રહી છે. ભવિષ્યના રોડમેપ અંગે વાત કરતા તેમણે '7 નિશ્ચય-3' યોજનાનો ઉલ્લેખ કર્યો અને 2030 સુધીમાં બિહારને દેશના અગ્રણી રાજ્યોમાં લાવવાનું વિઝન રજૂ કર્યું છે. તેમણે વડાપ્રધાન નરેન્દ્ર મોદીનો આભાર માનતા નવી સરકારને પોતાના માર્ગદર્શન અને સહયોગની ખાતરી આપી છે.

નીતિશ કુમારે પોતાના સંદેશની શરૂઆત 24 નવેમ્બર 2005ની તે ઐતિહાસિક તારીખથી કરી હતી, જ્યારે બિહારમાં પ્રથમ વખત એનડીએ (NDA) ની સરકાર બની હતી. તેમણે ગંભીરતાપૂર્વક નોંધ્યું કે તે સમયે બિહાર જે પરિસ્થિતિમાં હતું ત્યાંથી તેને બહાર લાવીને 'કાયદાનું શાસન' સ્થાપિત કરવું એ સૌથી મોટું પડકાર હતું. તેમણે દાવો કર્યો કે તેમની સરકારે હિન્દુ, મુસ્લિમ, સવર્ણ, પછાત કે દલિત એમ કોઈપણ ભેદભાવ વિના સમાજના દરેક વર્ગના ઉત્થાન માટે કામ કર્યું છે. શિક્ષણ, આરોગ્ય, રસ્તા, વીજળી અને કૃષિ જેવા પાયાના ક્ષેત્રોમાં જે ક્રાંતિકારી પરિવર્તનો આવ્યા છે તેને તેમણે પોતાની સૌથી મોટી સિદ્ધિ ગણાવી હતી.

ભવિષ્યની યોજનાઓ અને બિહારના વિકાસના આગામી તબક્કા વિશે ચર્ચા કરતા નીતિશ કુમારે જણાવ્યું હતું કે ૨૦૨૫ થી ૨૦૩૦ સુધીના વિકાસ માટે '૭ નિશ્ચય-૩' (7 Nishchay-3) નું માળખું પહેલેથી જ તૈયાર કરી લેવામાં આવ્યું છે. આ યોજના દ્વારા બિહારના ગામડાઓ અને શહેરોને આધુનિક સુવિધાઓથી સજ્જ કરવાનું લક્ષ્ય છે. તેમણે વડાપ્રધાન નરેન્દ્ર મોદીના નેતૃત્વ હેઠળની કેન્દ્ર સરકારનો વિશેષ આભાર માનતા કહ્યું કે કેન્દ્રના સતત સહયોગથી બિહાર હવે વિકાસની નવી ઊંચાઈઓ સર કરવા માટે સજ્જ છે. તેમણે વિશ્વાસ વ્યક્ત કર્યો કે બિહાર હવે દેશની પ્રગતિમાં વધુ મહત્વપૂર્ણ યોગદાન આપશે.

રાજીનામું આપવાનું કારણ સ્પષ્ટ કરતા નીતિશ કુમારે અત્યંત સાદગીથી કહ્યું હતું કે, અમે નક્કી કર્યું હતું કે હવે મુખ્યમંત્રીનું પદ છોડી દઈશું. મંત્રીમંડળની બેઠક બાદ તેમણે રાજ્યપાલને પોતાનું રાજીનામું સોંપ્યું હતું. જોકે, પદ છોડવા છતાં તેમણે બિહારની જનતાને ખાતરી આપી છે કે તેઓ સક્રિય રાજકારણમાં રહેશે અને નવી સરકારને જ્યારે પણ જરૂર પડશે ત્યારે તેમનું પૂરું માર્ગદર્શન અને સહયોગ મળતો રહેશે. નીતિશ કુમારે બિહારની જનતાનો આભાર માનતા રાજ્યના ઉજ્જવળ ભવિષ્ય માટે શુભેચ્છાઓ પાઠવી હતી.