Bhavnagar News : ભાવનગર શહેરમાં બનેલી હત્યાની આ ઘટનાએ સમગ્ર વિસ્તારમાં ચકચાર મચાવી હતી. કરચલીયા પરા વિસ્તારમાં મોહિત ટેભાણી નામના યુવકની નિર્દયતાપૂર્વક હત્યા કરવામાં આવી હતી. પ્રાથમિક તપાસમાં ખુલ્યું હતું કે ચાર શખ્સોએ તીક્ષણ હથિયારોના ઘા મારી મોહિતનો ખૂન કર્યો હતો અને ઘટનાસ્થળેથી ફરાર થઈ ગયા હતા. આ હત્યાનું મુખ્ય કારણ ઉછીના આપેલા પૈસાની લેતી-દેતીનો વિવાદ હોવાનું પોલીસ તપાસમાં સામે આવ્યું હતું.

ઘટનાના બે દિવસ પછી પોલીસે તમામ આરોપીઓને ઝડપવામાં સફળતા મેળવતાં શહેરમાં રાહતનો માહોલ છવાયો હતો. આરોપીઓ—કાનજી ઉર્ફે કાનો કાળુ બારૈયા, કિશન ઉર્ફે કાળો કોથમરી, રામ ઉર્ફે કાળીયો અને આર્યન બારૈયાને કડક સુરક્ષા વચ્ચે સ્થળ પર લઈ જઈ રિકન્સ્ટ્રક્શન કરાવવામાં આવ્યું હતું. પોલીસ અધિકારીઓની હાજરીમાં આરોપીઓ પાસેથી પૂરા ઘટનાક્રમની પુનઃઅવૃત્તિ કરાવવામાં આવી હતી, જેથી હત્યાની પાછળના સાચા કારણો, પદ્ધતિ અને સ્થળ પરની સ્થિતિ અંગે વધુ સ્પષ્ટતા મળી શકે.

રિકન્સ્ટ્રક્શન દરમિયાન આરોપીઓએ કેવી રીતે યોજના બનાવી, હથિયારોનો ઉપયોગ કર્યો અને ઘટનાના તરત બાદ કેવી રીતે ભાગ્યા તેની વિગત મેળવી તપાસમાં વધુ પુરાવાઓ જોડવામાં આવ્યા. પોલીસનાં જણાવ્યા મુજબ, મોહિત અને આરોપીઓ વચ્ચે ઘણા સમયથી પૈસાની ઉઘરાણી અંગે મનદ્વેષ ચાલી રહ્યો હતો, જે અંતે આ ભયાનક ઘટનામાં પરિવર્તિત થયો.

રિકન્સ્ટ્રક્શન પૂર્ણ થયા બાદ આરોપીઓને કોર્ટમાં રજૂ કરવાની પ્રક્રિયા શરૂ કરવામાં આવી છે. હત્યાના ગંભીર સ્વરૂપને ધ્યાનમાં રાખી પોલીસે આરોપીઓનો રિમાન્ડ મેળવવા તજવીજ શરૂ કરી છે, જેથી વધુ વિગતો બહાર આવી શકે અને કેસને મજબૂત બનાવવામાં આવે. શહેરના લોકો આ ઘટનાથી હજુ પણ અચંબામાં છે અને મોહિત માટે ન્યાય મળે તેની અપેક્ષા વ્યક્ત કરી રહ્યા છે.