નેપાળની નવી સરકારમાં ગૃહમંત્રી તરીકે નિયુક્ત થયેલા સુદાન ગુરુંગે ભ્રષ્ટાચારના ગંભીર આરોપો બાદ રાજીનામું આપ્યું છે. વિવાદાસ્પદ કારોબારી દીપક ભટ્ટની કંપનીઓ સાથે નાણાકીય સાંઠગાંઠ હોવાના અહેવાલો બાદ નેપાળની રાજનીતિમાં ગરમાવો આવ્યો હતો. ગુરુંગે સોશિયલ મીડિયા પર જાહેરાત કરી હતી કે તપાસ નિષ્પક્ષ રહે તે હેતુથી તેઓ પદ છોડી રહ્યા છે. નોંધનીય છે કે ગૃહમંત્રી બન્યા બાદ તેમણે પૂર્વ પીએમ કેપી ઓલી અને રમેશ લેખકની ધરપકડ કરાવીને સનસનાટી મચાવી હતી.

સુદાન ગુરુંગ પર લાગેલા આરોપો અત્યંત ચોંકાવનારા છે. નેપાળી અખબાર ઈ-કાંતિપુરના અહેવાલ અનુસાર, રાજકારણમાં પ્રવેશતા પહેલા ગુરુંગ 'હામી નેપાળ' નામના સામાજિક સંગઠનના વડા હતા. તપાસમાં બહાર આવ્યું છે કે આ સંગઠનને ફેબ્રુઆરી 2025 માં વિવાદાસ્પદ ઉદ્યોગપતિ દીપક ભટ્ટ સાથે સંકળાયેલી કંપનીઓના ખાતામાંથી આશરે 5 કરોડ રૂપિયા મળ્યા હતા. દીપક ભટ્ટ હાલમાં મની લોન્ડરિંગના ગંભીર કેસોમાં તપાસના ઘેરામાં છે. જ્યારે આ માહિતી સાર્વજનિક થઈ, ત્યારે પરિવર્તન અને સ્વચ્છ રાજનીતિના નામે સત્તામાં આવેલી ગુરુંગની પાર્ટી પર ભારે દબાણ આવ્યું હતું.

ગુરુંગે તેમના રાજીનામા અંગે સોશિયલ મીડિયા પર પોસ્ટ શેર કરતા જણાવ્યું હતું કે, 'હિતોનો સંઘર્ષ' (Conflict of Interest) ટાળવા માટે તેઓ પદ છોડી રહ્યા છે. તેમણે સ્પષ્ટ કર્યું હતું કે જો તેઓ ગૃહમંત્રીના પદ પર રહેશે તો તપાસ પ્રક્રિયા પ્રભાવિત થઈ શકે છે. તેમણે વધુમાં ઉમેર્યું કે તપાસના અંતિમ પરિણામ બાદ જ તેઓ પોતાના રાજકીય ભવિષ્ય અંગે કોઈ નિર્ણય લેશે. બે દિવસ સુધી ચાલેલા પક્ષના આંતરિક વિખવાદ અને વધતા જતા જાહેર આક્રોશ બાદ આખરે ગુરુંગે આ આકરો નિર્ણય લેવો પડ્યો હતો.

નોંધનીય છે કે સુદાન ગુરુંગે ગૃહમંત્રી બનતાની સાથે જ નેપાળની રાજનીતિમાં હલચલ મચાવી દીધી હતી. તેમણે પૂર્વ વડાપ્રધાન કેપી શર્મા ઓલી અને પૂર્વ ગૃહમંત્રી રમેશ લેખકની ધરપકડ કરાવી હતી. આ બંને નેતાઓ પર સપ્ટેમ્બર 2025 માં વિદ્યાર્થી આંદોલનને કચડી નાખવાનો અને બળપ્રયોગ કરવાનો આરોપ હતો. આ ધરપકડોને કારણે ગુરુંગ રાતોરાત હીરો બની ગયા હતા, પરંતુ હવે પોતાના પર લાગેલા આર્થિક આરોપોએ તેમની રાજકીય કારકિર્દી પર પ્રશ્નાર્થચિહ્ન લગાવી દીધું છે.

સુદાન ગુરુંગને બાલેન શાહ અને રવિ લામિછાનેના ખૂબ જ નજીકના ગણવામાં આવે છે. સપ્ટેમ્બર 2025 ના જન આંદોલનમાં તેમની સક્રિય ભૂમિકાને કારણે તેમને સરકારમાં મહત્વનું સ્થાન મળ્યું હતું. જોકે, જ્યારે તેઓ મુસીબતમાં ફસાયા ત્યારે તેમના સાથી નેતાઓ દ્વારા પણ બચાવ કરવામાં આવ્યો ન હતો. હવે નેપાળમાં એ ચર્ચા ચાલી રહી છે કે શું બાલેન શાહ આ ખાલી પડેલી બેઠક પર કોઈ અન્ય સ્વચ્છ છબી ધરાવતા નેતાની નિમણૂક કરશે કે કેમ.